Eksodos
Ἀλκμήνη
οἵ σʼ οὐκ ἔδεισαν. δεῖ σε κατθανεῖν κακῶς,
καὶ κερδανεῖς ἅπαντα· χρῆν γὰρ οὐχ ἅπαξ
θνῄσκειν σὲ πολλὰ πήματʼ ἐξειργασμένον.
960
Χορός
οὐκ ἔστʼ ἀνυστὸν τόνδε σοι κατακτανεῖν.
Θεράπων
ἄλλως ἄρʼ αὐτὸν αἰχμάλωτον εἵλομεν;
Ἀλκμήνη
εἴργει δὲ δὴ τίς τόνδε μὴ θνῄσκειν νόμος;
Χορός
τοῖς τῆσδε χώρας προστάταισιν οὐ δοκεῖ.
Ἀλκμήνη
τί δὴ τόδʼ; ἐχθροὺς τοισίδʼ οὐ καλὸν κτανεῖν;
965
Χορός
οὐχ ὅντινʼ ἄν γε ζῶνθʼ ἕλωσιν ἐν μάχῃ.
Ἀλκμήνη
καὶ ταῦτα δόξανθʼ Ὕλλος ἐξηνέσχετο;
Χορός
χρῆν δʼ αὐτόν, οἶμαι, τῇδʼ ἀπιστῆσαι χθονί;
Ἀλκμήνη
χρῆν τόνδε μὴ ζῆν μηδʼ ὁρᾶν φάος ἔτι.
Χορός
τότʼ ἠδικήθη πρῶτον οὐ θανὼν ὅδε.
970
Ἀλκμήνη
οὐκ οὖν ἔτʼ ἐστὶν ἐν καλῷ δοῦναι δίκην;
Χορός
οὐκ ἔστι τοῦτον ὅστις ἂν κατακτάνοι.
Ἀλκμήνη
ἔγωγε· καίτοι φημὶ κἄμʼ εἶναί τινα.
Χορός
πολλὴν ἄρʼ ἕξεις μέμψιν, εἰ δράσεις τόδε.
Ἀλκμήνη
φιλῶ πόλιν τήνδʼ· οὐδὲν ἀντιλεκτέον.
975
τοῦτον δʼ, ἐπείπερ χεῖρας ἦλθεν εἰς ἐμάς,
οὐκ ἔστι θνητῶν ὅστις ἐξαιρήσεται.
πρὸς ταῦτα τὴν θρασεῖαν ὅστις ἂν θέλῃ
καὶ τὴν φρονοῦσαν μεῖζον ἢ γυναῖκα χρὴ
λέξει· τὸ δʼ ἔργον τοῦτʼ ἐμοὶ πεπράξεται.
980
Χορός
δεινόν τι καὶ συγγνωστόν, ὦ γύναι, σʼ ἔχει
νεῖκος πρὸς ἄνδρα τόνδε, γιγνώσκω καλῶς.
Ἐυρυσθεύς
γύναι, σάφʼ ἴσθι μή με θωπεύσοντά σε,
μηδʼ ἄλλο μηδὲν τῆς ἐμῆς ψυχῆς πέρι
λέξονθʼ ὅθεν χρὴ δειλίαν ὀφλεῖν τινα.
985
ἐγὼ δὲ νεῖκος οὐχ ἑκὼν τόδʼ ἠράμην·
ᾔδη γε σοὶ μὲν αὐτανέψιος γεγώς,
